Genesis 8
Nammári áufirafa taikóo úfafa.
1Márufanoo Ánutufa Nooanara fáqa narí áiku ásauku faqa aiqáma áandau miná fáqa márusara faqa iriséenoo qufanóo úfai úqufanoo nammári fannoo qúmi marínau. 2Maqá ameemaanaindari nammári ururée máruna rafáaqa finau. Rafáaqafuséenoo innaarúna kooqíara foorá ititásoofanóo innaarúnaindaraa námmari fáqa sía quminau. 3Ititá fufanóo maqásaa nammári fánnoo íreeda kai íreeda kai óoru maree óoru máree qúmiqúmíi ufanóo maqá koorooinau. 150 súanisaa nammári qúmimarinau. 4Dínni taikáseenoo dínni óonu qaaraqánda marasée 7 qúqoonasáa miqí mándee qúqoonna qámbaanai qísaukuqara faqa dínni qíku taikáseenoo dínni óonu qaara marasée 17 fáasaana Nooana sípa fannoo Ararata áaqanasaa múqufi quqásoofanoo márinau. 5Miqóoqari nammári uru máree óoqinufanóo qísaukuqara taikásee 10 qúqoonasaa indaarúqaa fáasaanasaa áaqana átiuqa koorooináù.6Qaara fasiqa níku nísauku taikásee 40 fáasaana áiqaróofanoo Nooafa winduáqa atúáseenoo ufini kaamméesa fooqáana mára áqinau. 7Ufiní fannóo sía kaifáa áninau. Káqi kai qáqánoo nímárinau. 8Nooafa mi ufinínara rakísúsia sía ánufanoo nakipurúna mara áquseenoo nammári qáfaanifeera aqiqanau. 9Áqusoofanóo nakipurúna maqára randóosianóo nammári káqi márufanoo mi eendánaki kaí kaifáa Nooafunnái sípaki áninau. Nooafa narí ásauku mádaanai quqáseenóo qumára sípaki quqánau. 10Qísauku dínni taikásee dínni óonu qaara marasée 7 fáasaana áfeesida máriufanoo Nooafa nakipurúna kaiqáa maréeqeenoo mádaanai áqinau. 11Eenée márufanoo nakipurúna fannoo oorifa sáqari ámanee ámmunirana rakéemma aakú máree áninau. Nooafa mi saqari amaneená qáfamaseenoo dóo nammári óoqi máridanoo fée qínau. 12Miqóoqari kaifáa dínni taikásee dínni oonu qaara marasée (7) fáasaana áiqaróo fanooo Nooafa nakipurúna kafáa mara quqásoofanoo dóo funnái fífinoo dóo sía kafáa áninau. 13Nooafa 601 áukuana marasoofanóo indaarúqaa qúqoona indaarúqaa fáasaanasaa nammári túkaqnanau. Nooafa sípa ataufakaaqa akuámaqaqoona rafáammasee qáfoofanoo maqá aadána úsimarinau. 14Namba 2 qúqoonasaa 27 fáasaanasaa aiqáma nammári túkaqnamáfufanoo maqa máaqa aadána uqanná márinau.
15Miqímmafufanóo Ánutufa Nooana qímaminoo qinau. 16Doo sípakiqari anée faqa aneenná ánaaqa faqa aneenná faiqi námu faqa misá nínáaqmaaka faqa ráudaaqa. 17Áiqáma ufiniuqá faqa aandáùqa faqa nífiqee ráudaaqa. Ráudamafiqa maqa máaqaki daráaniqa asumu moómoo kambíaaqa.
18Miqí qímasoofanoo Nooafa fáqa narí ánaaqa faqa narí faiqi námu faqa misá nínáaqmaaka faqa sípakiqari ráudaqau. 19Aiqáma áandauqa faqa ufiniuqá faqa narí óosana narí óosana kai moodáanaki suqúfufaqa ráudamaki daráaniqau.
Nooafa karaambáiqa tatúfirana suqá áminau.
20Nooafa rafúdamafufanóo karaambáiqa tatúfirana suqárara óoni qumáreenoo áaku aakummáseenoo Ánutuna áfusaa ánukara áandau faqa ufini faqa maraséenoo múduka Ánutuna tatúfirana suqá áminau. 21Suqóofanóo miná áfunda karaambáiqa aikiambú ufanóo udiráma qáfeenoo asasinau. Asasammáseenoo maaqí qímasee qímmirinoo qinau. Sía qinée kaifáa faiqí ínni mandáinaina ákiiqara aiqáma máqa máaqa niqúráráanauranoo. Ínneeqa faiqì sáaqari írirana faqa márirana faqa mandáika kai ímarunara sía kaifáa únandée íqa maqa máaqa afaaqasása mária fásiqa ánaaseesa faqa aandáù dóodáani faqa náru taikáanaura.22Ánutufa minára maaqí qímasee qinau.
Maa maqáfa káqi márinaqa
qúmmaqira áukuana faqa nárana nára áukuana faqa
suara fáqa aiqaiqá faqa aaku áukuana faqa
súani áukuana faqa fáasaana fáqa eendáki faqa
sía taiká nímaqaanaura, káqi márifaranoo.
Copyright information for
BJR